Tjaelebe! Tjaelemegaahtjeme maanide jïh noeride!

Saemien lohkemejarnge lea tjaelemegaahtjemem maanide jïh noeride maadthskuvlesne jïh jåarhkeskuvlesne dorjeme! Daesnie maahtah vielie tjaalemegahtjemen bïjre lohkedh.

Njoelkedassh tjaelemegaahtjemasse:

  • Tjaelemegaahtjeme noerhte-, julev-, jïh åarjelsaemien.
  • Tjaelemegaahtjeme maanide jïh noeride maadthskuvlesne jïh jåarhkeskuvlesne. Mijjen leah 4 klaassh:
  • 1-4 daltese (reakadamme jaepieh 2010-2013)
  • 5.-7. daltese (reakadamme jaepieh 2009-2007)
  • 8.-10 daltese (reakadamme jaepieh 2006-2004)
  • Jåarhkeskuvle (reakadamme jaepieh 2003-2001)
  • Teekstegåhkoe 1.-7.daltesidie edtja unnemes 50 baakojne årrodh.
  • Teekstegåhkoe noereskuvlese jïh jåarhkeskuvlese edtja unnemes 150 baakojne årrodh. Bielelen diktide.
  • Teekste edtja seedtesovvedh e-påastine lohkanguovddas@samiskhs.no ruffien 1. b. Åvtelen.

Veeljh aamhtesem:

  1. Tjaelieh maam joem dehtie dov aarkebiejjeste man bïjre maam tuhtjh buerie jallh ij buerie, man bïjre mestie eadtjaldovvh jallh mestie geerjene sjïdth jallh mestie mårradovvh. 

Tjaelieh:

  • prievine gïese båetije beajjan
  • biejjiegærjine
  • soptsesinie, man bïjre mij heannadi
  1. Lohkh aktem saemiengïeleldh gærjam jïh tjaelieh maam dan bïjre tuhtjh, magkerh domtesh jïh åssjalommesh åadtjoeh.
  2. Veeljh aamhtesem jïh sjangerem jïjtje.

Teekstide bæjhkoehtidh:

  • Teekstide båetieh bæjhkoehtidh jïjtse gærjetjisnie jïh Saemien lohkemejarngen nedtebieline. (lohkanguovddas.no, Ovttas.no jïh dan facebook bielesne).
  • Bæjhkoehtimmien åvtelen teeksth staerieduvvieh.
  • Teekstide aaj maehtieh bæjhkoehtidh lijkienommine jis sæjhta.

Sjïeledimmie

  • Teeksth mah vitnieh båetieh veeljesovvedh jis teekste buerie lohkemedååjresem vadta jïh aavode tjaeledh.
  • Akte jurjie dejtie golme bööremes teekstide veeljie fïerhtede klaasseste 1., 2., jïh 3. sijjide, fïerhtene saemiengïelesne.

1. sjïele kaabelapts tellefovne (trådløs hodetelefon)

2. Bluetooth høyttalere

3. Gærjapaahka.

Lissine daase aaj 5 sjïelh (Powerbank) dejstie jeatjah teekstijste vadtasuvvieh.

Jørn Jensen Lærhandel lea mijjen voestes annonsöövre Saernieh nehtesæjrosne

Goevten Jørn Jensen Lærhandel voestes annonsöövre Saernieh nehtesæjrosne sjidti.

Jørn Jensen Lærhandel lea fuelhkiesïelte mij lea skåerrine jïh hovrine 50 jaepiej bijjeli barkeme. Sïelte skåerriem jïh hovrem duaka vaarjojde, veaskojde, nejpide, dahpide, geasastahkide jïh nimhtie.

Arild Jensen lea fuelhkiesïelten fïerhtenbeajjetjen åejvie, mohte lij dan aehtjie, Jørn Jensen mij sïeltem eelki. Jørn Jensen lea fuelhkiesïeltem 50 jaepiej bijjeli stuvreme. Daelie dïhte pensjonistine sjidteme, mohte læjhkan lyjhkoe viehkiehtidih.

Jørn Jensen aaj jeahta saemien siebriedahkem damta juktie pråvhka dalhketjh aaj båatsoeburride jïh saemide doekedh.

Jørn Jensen lea fuelhkiesïeltem 50 jaepiej bijjeli stuvreme. Daelie Jørn Jensen Lærhandel lea mijjen voestes annonsöövre Saernieh nehtesæjrosne. Guvvie: Tore Østby.

-Mov baalka saemien siebriedahkese lea mov rïektes vaajnoe saemien vytnesjæmman. 40 jaepiej bijjeli manne leam saemien duedtiem tjöönghkeme, dovne myövhkes vætnah goh skåerrieh, garres vætnah goh nejpieh, dahph jïh nimhtie. 40 jaepiej bijjeli Jåhkåmåhken maarhnesne manne leam gellie tryjjes almetjidie råakeme. Dovne saemien ööhpehtimmiejarngesne jïh nimhtie leah gellie gaskesh saemien siebriedahkesne munnjien vadteme, Jørn Jensen jeahta.

Mijjieh Saernieh-ståvrosne aaj sïjhtebe jiehtedh: Datne aaj sïjhth annonesem mijjen nehtesæjrose bïejedh? Gaskesadth Anita Holmberg Sivertsgård jïh rïngkh +47 996 34 190.

PRM: Pilovtemaanagïerth veeljesovveme saemien maanagïerteprosjektese

Saemiedigkieraerie lea njieljie pilovtemaanagïerth veeljeme mah SáMOS-prosjekten tjïrrh edtjieh saemien maanagïerten båetijem aejkiem hammoedidh.

Doh njieljie maanagïerth mah leah pilovtemaanagïertine veeljesovveme daan aejkien leah: Suaja maanagïertesne Snåasesne, Álttá siida AS Altesne, Árran mánáigárdde AS Ájluoktesne jïh Badjemánáid beaiveruoktu AS Karasjohkesne.

Saemiedigkieraerie Mikkel Eskil Mikkelsen. Guvvie: Åse M.P. Pulk/Saemiedigkie.

Prosjeekten tjïrrh SáMOS – Saemien maanah orre ektietjiehtjielisnie) edtja saemien maanagïertestruktuvrem jarkelidh vïjhte jaepine, våaroeminie saemien filosofijesne jïh aerpievuekien daajrojne. Ulmie pilovtemaanagïerteöörneginie lea maanagïertem saemiestehtedh jïh dan tjïrrh våaromem vedtedh Saemiedigkien SáMOS-prosjektese, juktie saemien maanagïertepedagogihkem jïh barkoevuekiem evtiedidh saemien maadthåssjaldahki mietie.

– Daelie SáMOS-prosjekte dan gåhkese båateme guktie dïhte vielie tjïelkelaakan edtja dotkedh jïh saemien barkoevuekieh evtiedidh saemien maanagïertigujmie ektine. Ïedtjije sjædta dam saemien pedagogihkeles evtiedimmiem bæjjese fulkedh åvtese saemiedigkieraerie Mikkel Eskil Mikkelsen (NSR) jeahta.

Pilovtemaanagïerteöörnegasse uktsie ohtsemh böötin. Akte dejstie ohtsijijstie idtjin krïevenassid jååhkesjh juktie pilovtemaanagïertine sjïdtedh. Gosse pilovtemaanagïerth veeljesovvin dellie unnemes akte edtji julevsaemien dajveste årrodh, akte åarjelsaemien dajveste jïh akte noerhtesaemien dajveste, dovne mearoegaedteste, staareste jïh sislaanteste.

– Saemiedigkie lij vaajtelamme mijjieh meehtimh gaajhkh gaektsie maanagïerth pilovtemaanagïertine veeljedh, men vierhtiej gaavhtan tjoerebe evtiedimmiebarkojne nïerhkedh njieljie maanagïertine daan aejkien, Mikkelsen jeahta.

Saemiedigkieraerie aaj nænnoesti gosse nuepiem vadta pilovtemaanagïertine syökedh minngeben aejkien, dellie edtja daejtie maanagïertide, mah idtjin prioriteetem åadtjoeh daelie, orre ohtsijigujmie ektine vuarjasjidh. Daah maanagïerth leah: Luvlege maanagïerte jïh Ysterhagen maanagïerte, goevtese Svaale Rørosesne, Fossens maanagïerte Gáivuotnesne, Sentral maanagïerte Altesne jïh Guovssahas maanagïerte Romsesne.