Daenbien Aajege lea fuelhkiebiejjiem öörneme

Mikkel Eskil Mikkelsen jïh Toini Bergstrøm. Guvvie: Jenny-Krihke Bendiksen

Abpe våhkoem Aajege jïh jeatjah institusjovnh leah ovmessieh öörnemh Gïelevåhkoen doekoe dorjeme. Daan biejjien Aajege lea fuelhkiebiejjiem öörneme, gusnie maanah jïh eejtegh meehtin ektesne tjåanghanidh jïh tryjjedidh. Daenbien dle medtie 55 almetjh fuelhkiebiejjiem dåeriedin jïh Aajegen åvtehke, Toini Bergstrøm jeehti daate biejjie lea hijven orreme.

Mikkel Eskil Mikkelsen Saemiedigkieraeresne barka jïh dïhte tuhtje Gïelevåhkoe joekoen hijven orreme. Guvvie: Jenny-Krihke Bendiksen.

Mikkel Eskil Mikkelsen Saemiedigkeste aaj fuelhkiebiejjiem dåeriedi jïh tuhtji gaajh hijven Aajege lea daam biejjiem öörneme.

-Daan biejjien gaajh lustes jïh hijven biejjie orreme. Saemiedigkien åvteste manne leam åådtjeme diekie Plassjese båetedh, jïh Plassjen gïelebarkoem vuartasjidh. Manne tuhtjem luste viuejnedh dan soe gellieh maanah jïh eejtegh Aajegasse böötin jïh fuelhkiebiejjiem dåeriedin, Mikkel Eskil Mikkelsen jeahta.

Mikkel Eskil aaj jeehti ahte dah Saemiedigkesne tuhtjin daate Gïelevåhkoe joekoen hijven orreme. Satne aaj jeehti Saemiedigkien ulmieh lin dejtie saemiengïelide lutnjedh. V.g. ovmessieh kampanjh öörnedh, skilth tseegkedh, fuelhkiebiejjieh öörnedh jih numhtie. Dïhte jeehti lea smaave råajvarimmieh mejtie vihkelommes, jïh ij baarre stoerre råajvarimmieh darjodh.

Minngemosth Toini Bergstrøm jeehti vihkeles aaj ussjedidh ahte Gïelevåhkoen mænngan jåerhkebe gïelem lutnjedh.

-Fïerhte almetje tjuara ussjedidh «guktie manne maahtam gïelem lutnjedh?». Dïhte lea gaajh vihkeles. Mijjieh tjoerebe aaj dïhte gïelem vuajnadidh. Manne tuhtjem dïhte aaj lea vihkeles gaajhkh dah almetjh gïelem vuejnieh jïh goltelieh, Toini Bergstrøm.

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest