Raasten Rastah: filmh – tuhtjebe luste dan gellie almetjh diekie böötin

Thomas Ole Andersen (guvvie: Tore Østby) jïh Stig Eebre Somby (guvvie: Naina Helen W Jåma)

Don våhkoen fïlmhfestivaale man nomme «Raasten Rastah: filmh» Plassjesne öörnesovvi. Gåabpatjahkh Stig Eebre Somby jïh Thomas Ole Andersen lægan Aajegisnie barkeminie jïh dah guaktah lægan filmhfestivaalem stealladamme. Juktie daate voestes aejkien Raasten Rastah filmh-festivaale lea öörnesovveme jïh dan gavhtan Thomas Ole jïh Stig Eebrie jiehtiejægan luste vuejnedh dan soe gellie almetjh diekie böötin.

Dah guaktah jiehtiejægan tuhtjidh lij stoerre programme, jeenje deahpadi jïh tuhtjidh nov gujht hijven gåeredi. Juktie gellie almetjh v.g. Filmhfestivaalen rïhpestæmman, fïlmh-aeredsbeapmose jïh Sööfe-raajrose böötin.

-Mijjieh sïjhtimh jienebh almetjh Plassjen dajveste aaj filmhfestivaalese mïnnin, mohte læjhkan mijjieh libie geerjene filmhfestivaalen åvteste, Thomas Ole jeahta.

Mijjieh åadtjobe Ida Marie Bransfjell, Lene Ailin Brandsfjell jïh Aasta Joma Granefjell orre maana-raajrosne «Sööfe» vuartasjidh. Guvvie: Jenny-Krihke Bendiksen.

Dah guaktah aaj jiehtiejægan filmh leah dagkeres nænnoes meedija. Jiehtiejægan sïjhtidh dejnie filmhfestivaaline vuesiehtidh ibie daarpesjh naa stoerre barkoe darjodh. V.g. Dah Gïeleviehkieh vuesiehtieh guktie lea vihkeles fïlmine barkedh jïh guktie fïlmh almetjidie dijpieh.

-Mijjieh aaj noere-workshoppem utnimh jïh tuhtjimh dej fïlme lij buerie kvaliteete jïh lij luste vuejnedh. Juktie dah noerh vuesiehtieh gåerede saemiengïelesne fïlmigujmie barkedh. Tuhtjebe aaj gaajh vihkeles noerigujmie barkedh. V.g. Dah noerh åadtjoejin kafeesne barkedh jïh aaj fïlmem darjodh, Stig Eebre Somby jeahta.

Filmhfestivaalen åvtelen Stig Eebre Somby aaj buerkeste mannasinie tuhtjie daate filmhfestivaale daerpies jïh vihkeles lea:

-Voestegh lea vihkeles juktie lea dan vaenie råakedimmiesijjieh saemide. Dan åvteste gaajh vihkeles festivaalh jïh jeatjah areenah stealladidh. Daate aaj lea vihkeles juktie tjoerebe jallh daarpesjibie mijjen histovrijem orrestidh jallh ikth vielie tjaeledh, juktie ibie mijjieh daam tjaaleme. Daate saemien filmh-festivaale lea vuekie gumhtie maehtebe aaj mijjen histovrijen bïjre soptsestidh jïh vuesiehtidh mijjieh ennje daesnie. Juktie lea naa jïjnjh histovrije mijjen dajveste mij ij leah ennje filmen tjïrrh soptsestovveme. Sïjhtem aaj mijjen åarjelsaemien dajvem jïh kultuvrem filmen tjïrrh vuesiehtidh, Stig Eebre Somby jeahta.

Båetije jaepien dellie festivaale Raasten Rastah edtja Plassjesne öörnesovvedh. Thomas Ole jïh Stig Eebrie jiehtiejægan sijhtiejægan Raastan Rastah:filmh aaj edtja mubpien jaepien årrodh. V.g. Don jaepien Raasten Rastah öörnesovvi, daan jaepien Raasten Rastah: filmh öörnesovvi, båetije jaepien Raasten Rastah öörnesåvva jïh jaepien 2021 Raasten Rastah: filmh bist edtja öörnesovvedh.

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest