Marja Helena Fjellheim Mortenson jïh Daniel Herskedal.

Saemiedigkie dåarjoem Beaivvášen heevehtimmiegærjese jïh konsertese Marja Mortensson jïh KORK:ine vadta

Jaepien 2021 Saemien Nasjonaaleteatere Beaivváš 40 jaepieh heevehte, jïh dan sjïekenisnie edtjieh fotodokumentarihkeles gærjam bæjhkoehtidh. Saemiedigkieraerie 200 000 kråvnah barkose gærjine dåårje.

Saemiedigkieraerie Henrik Olsen. Guvvie: Kenneth Hætta.

Beaivváš gieltegs jïh vihkeles histovrijem åtna goh saemien kulturelle premissedeallahtæjja. Jïjnje heannadamme dehtie raejeste teatere tseegkesovvi varke 40 jaepiej juassah goh frijje dåehkie dejnie dramatihkeles heannadimmine deepmesjimmien bïjre Alta-Gouvdageaidnujeanoste, jïh daan biejjien raajan goh profesjonelle teatereinstitusjovne mij bïjre jarkan gellien aejkien jaepien mïnnede abpe Saepmesne. Goh bievnije saemien gïeleste jïh kultuvreste Beaivváš joekoen stoerre aarvoem åtna.

«Saemiedigkieraerie heevehtimmiegærjam vuarjesje goh joekoen vihkeles siebriedahkese, jïh saemien nasjonaaleteateren histovrije åehpies sjædta,» saemiedigkieraerie Henrik Olsen jeahta.

Åarjelsaemien festivaalen sjïekenisnie Raasten rastah, konserte edtja öörnesovvedh Marja Mortensson jïh Krinkastingsorkesterinie (KORK) Røros gærhkosne skïereden 25. b. daan jaepien. Saemiedigkieraerie 179 000 kråvnah dåårje Raasten rastah-festivaalese daan öörnedæmman.

Konserte aaj meatan saemien tv-produksjovnesne gusnie NRK Sápmi åarjelsaemien aamhtesh jarngesne åtna seamma tïjjen goh festivaale öörnesåvva. Baantedimmie dorjesåvva konserteste maam edtja mænngan NRK:sne vuesiehtidh.

«Stoerre heannadimmie konserte Rørose bïejesåvva. Naemhtie aaj saemien goltelæjjah åadtjoe meatan årrodh daam dååjredh sijjen hïejmedajvesne. Gosse konserte lea Røros gærhkosne dellie dïhte aaj sjïere lïhkesvoetem vadta årroejidie», saemiedigkieraerie jeahta.

Share on facebook
Facebook
Share on twitter
Twitter
Share on linkedin
LinkedIn
Share on google
Google+