Guvvie: Tom Gustavsen.

Saemiedigkie Rørosrein bielie millijovnigujmie dåårje

Saemiedigkieraerie lea nænnoestamme 500 000,- kråvnah dåarjojne vedtedh sïeltese Rørosrein AS, mij daelie edtja stuerebe evtiedimmieprosjektine nierhkedh.

Saemiedigkieraerie Silje Karine Muotka. Guvvie: Kenneth Hætta.

Rørosrein jåarhkeevtiedimmine bovtsenbearkoste gïehtele, jïh lissine gåassoehtimmiegåetiem Röörosen jarngesne åtna gusnie beapmoem gåassoehtieh mij voenges saemien aerpievuekieh våaroeminie åtna.

-Sjollehke mijjieh maehtebe sïeltem dåarjodh mij voenges saemien aerpievuekieh jåarhkeevtiedimmesne nuhtjie, jïh lissiehtamme aarvoesjugniedimmiem dajven bovtsenbearkoste åådtje, saemiedigkieraerie Silje Karine Muotka (NSR) jeahta.

Rørosrein edtja daelie jienebi fysiske skåårvemigujmie nïerhkedh. Dah sijhtieh skåårvemh darjodh sijjen tseegkeldahkesne juktie maehtedh sijjen produksjovnem lissiehtidh. Lissine sïelte sæjhta skåårvemh gåassoehtimmiegåetesne darjodh guktie gåetie vielie maereles sjædta.

-Mijjen leah nuepieh prosjekth abpe laantesne dåarjodh mah definisjovni nualan båetieh goh lissiejielemh båatsosne jallh saemien fealadasse. Mijjieh maaje eantan jienebh prosjekth sïjhtebe daej suerkiej sisnjeli åvtese, Muotka minngemes jeahta.

Vierhtieh vadtasuvvieh påasteste 40510 – Dåarjoe jeereldihkie jieliemasse, prioriteradimmien nuelesne Lissiejieleme båatsoe.

Share on facebook
Facebook
Share on twitter
Twitter
Share on linkedin
LinkedIn
Share on google
Google+